Pas zhvillimeve të ditëve të fundit në veri të Kosovës, forcat paqeruajtëse të NATO-s, KFOR paralajmëruan se janë të gatshme të ndërmarrin të gjitha masat e nevojshme kundër zhvillimeve që mund të cënojnë sigurinë dhe stabilitetin rajonal. Synimi i qeverisë së Kosovës për hapjen e urës mbi lumin Ibër, mbyllja e zyrave të Postës së Serbisë dhe protestat e serbëve të veriut, bënë që të ketë reagime të shumta ndërkombëtare duke akuzuar qeverinë e Kosovës për veprime të njëanshme dhe të pa pakoordinuara që rrezikojnë stabilitetin rajonal. KFOR-i në një deklaratë për shtyp tha ndërkohë se trupat e tij patrulluan gjatë një proteste të serbëve në afërsi të urës mbi lumin Ibër që ndan qytetin në dy pjesë. "Trupat e KFOR-it ishin në vendin e ngjarjes dhe kryen patrullime në zonat përreth, për të garantuar një mjedis të sigurt”. Në të njetën kohë, komandanti i KFOR-it, Ozkan Utulash, u takua me shefin e Shtabit të Përgjithshëm të Forcave të Armatosura të Serbisë, Millan Mojsilloviç, në Beograd, për të biseduar "për gjendjen e sigurisë në Kosovë”. "Ky ishte një takim i rregullt i nivelit të lartë, ku u bisedua edhe për bashkëpunimin mes ushtrisë serbe dhe KFOR-it në detyrën tonë të përbashkët për krijimin e një mjedisi të sigurt në Kosovë”, thuhet në njoftimin e ushtrisë së Serbisë. Ndërkaq, KFOR-i tha se "Utulash dhe Mojsilloviç shkëmbyen qëndrimet e tyre për gjendjen e sigurisë dhe ndikimin e saj në stabilitetin rajonal, si dhe për aktivitetet e bashkëpunimit”. Qeveria e Kosovës po synon që ta hapë urën mbi lumin Ibër edhe për qarkullimin e automjeteve, gjë që nxiti reagimin e serbëve.