Çlirim Iseni, student dhe një nga organizatorët e protestës së paralajmëruar për të drejtën e përdorimit të gjuhës shqipe në Maqedoninë e Veriut, ka reaguar pas publikimit të disa pamjeve nga një paradë e forcave speciale maqedonase në lagjet urbane të Kumanovës. Në video, efektivët shihen duke zhvilluar stërvitje në rrugë dhe duke brohoritur: “Këtu ka vetëm Maqedoni, le ta mësojnë të gjithë”. Përmes një reagimi publik, Iseni ngriti pikëpyetje nëse parada me thirrje nacionaliste ishte një rastësi apo një mesazh kërcënues ndaj studentëve shqiptarë dhe protestës së paralajmëruar. “Pyetja që lind është nëse kjo është një rastësi apo një paralajmërim. Përgjigjja jonë është e qartë: ne do të vazhdojmë çdo formë paqësore dhe demokratike për realizimin e së drejtës sonë legjitime, gjuha shqipe zyrtare”, shkroi ai.