Turqia duhet të tërheqë një kërcënim lufte 30-vjeçar kundër Greqisë nëse dëshiron që Athina të japë pëlqimin që Ankaraja të ketë akses në fondet e mbrojtjes të Bashkimit Evropian, tha të enjten kryeministri grek Kyriakos Mitsotakis. Greqia dhe Turqia, aleatë të NATO-s, por armiq historikë, janë përplasur për dekada të tëra për një sërë çështjesh, që nga hapësira ajrore e deri te shtrirja e kufijve të tyre detarë apo Qiproja e ndarë etnikisht. Në vitin 1995, parlamenti turk shpalli një "casus belli", ose shkak për luftë, ndërsa Greqia zgjeroi në mënyrë të njëanshme ujërat e saj territoriale përtej gjashtë miljeve detare në Detin Egje. "Nëse Turqia dëshiron akses në mjetet evropiane të financimit të mbrojtjes, shqetësimet legjitime si të Greqisë ashtu edhe të Qipros duhet të merren në konsideratë", tha Mitsotakis, duke iu referuar projekteve të tilla si fondi i ri kryesor i BE-së për blerjen e armëve, Security Action for Europe. "Kanë kaluar 30 vjet që kur Asambleja Kombëtare Turke votoi për casus belli-n famëkeq. Mendoj se 30 vjet më vonë, ka ardhur koha t'u kërkojmë drejtpërdrejt miqve tanë turq ta heqin nga tavolina", tha ai për radion Skai. Mitsotakis tha se do t'ia përcjellë mesazhin Presidentit turk, Recep Tayyip Erdogan, së shpejti, duke përmendur përmirësimin e marrëdhënieve dypalëshe. Qeveria turke nuk ishte menjëherë e disponueshme për koment.