Pas deklaratës së komisioneres evropiane për Zgjerim, Marta Kos, se KE kisjte ndaluar shpërndarjen e fondeve për Serbinë për shkak të ligjeve gjyqësore kontroverse, Komisioni Evropian përmes zëdhënësit të tij, Markus Lammers ka konfirmuar se nuk ka ndonjë vendim formal për ngrirjen e mjeteve financiare nga Plani i Rritjes i Bashkimit Evropian për Beogradin. Sipas zyrtarit europian, KE vlerëson vazhdimisht nëse përmbushen kushtet përkatëse për mbështetje sipas instrumenteve financiare të BE-së. Ai përsëriti shqetësimet e ngritura nga institucionet evropiane në lidhje me miratimin e ligjeve gjyqësore dhe deklaroi se Serbia pritet ta zbatojë plotësisht mendimin e Komisionit të Venedikut mbi këtë legjislacion. Deklarata e zëdhënësit të KE, pasoi ato të komisioneres evropiane Marta Kos, të bëra pak ditë më parë, e cila tha se si pasojë e regresit në fushën e drejtësisë, janë pezulluar të gjitha pagesat nga Plani i Rritjes për Serbinë. Kos ka paralajmëruar edhe më herët se ligjet në Serbi, kufizojnë pavarësinë e gjyqësorit. Komisioni i Venecias ka vlerësuar gjithashtu se ndryshimet e fundit në paketën e ligjeve për gjyqësorin në Serbi, janë hequr mbrojtjet ekzistuese të autonomisë së prokurorisë.