Të paktën 18 persona janë vrarë dhe dhjetëra të tjerë janë plagosur në dy sulme të ndara në Kolumbi, duke thelluar krizën më serioze të sigurisë në vend në dekada. Gjashtë persona hmbën jetën dhe më shumë se 60 u plagosën pasi një auto bombë shpërtheu në një rrugë të ngarkuar në qytetin perëndimor të Calit në Kolumbi, sipas autoriteteve. Më herët të enjten, një sulm i veçantë me dron kundër një helikopteri policie vrau të paktën 12 persona në një zonë rurale jashtë qytetit veriperëndimor Medellin. Sulmet, të cilat i atribuohen fraksioneve të ndryshme disidente të grupit tani të shpërbërë Forcat e Armatosura Revolucionare të Kolumbisë, Farc, paraqesin sfida të reja për proceset e brishta të paqes në Kolumbi përpara zgjedhjeve të vitit të ardhshëm. Alejandro Eder, kryebashkiaku i Calit, shpalli gjendjen e jashtëzakonshme në qytetin e tretë më të populluar të vendit. Ai gjithashtu njoftoi një ndalim të përkohshëm të hyrjes së kamionëve të mëdhenj në qytet dhe i bëri thirrje publikut të japë informacion në lidhje me incidentin për një shpërblim prej 10,000 dollarësh. Pas të dy sulmeve, presidenti dhe lidershipi ushtarak njoftuan se do të mbanin një takim të këshillit të sigurisë për të "përcaktuar masa shtesë mbrojtëse" për qytetarët. "Shteti nuk do t'i nënshtrohet terrorizmit. Këto krime do të ndiqen dhe ndëshkohen me forcën e plotë të ligjit", tha Ministria e Mbrojtjes në një deklaratë. Kolumbia ka përjetuar një rritje të dhunës në muajt e fundit që përfshin përleshje midis forcave të sigurisë dhe rebelëve disidentë, paraushtarakëve ose karteleve të drogës.