Top News-Karabinierët italianë në veri të Kosovës/BE forcon praninë e EULEX pas tensioneve të fundit

Shefi i Politikës së Jashtme të Bashkimit Evropian, Josep Borrell, tha se një njësi karabinierësh italianë ka arritur ne Kosovë për të siguruar sundimin e ligjit në dritën e zhvillimeve të reja në veriun e Kosovës, pas tërheqjes së punonjësve serbë nga të gjitha institucionet vendase. “Në këto kohë të tensionuara në Kosovë, Misioni i Bashkimit Evropian për Sundimin e Ligjit, EULEX përmbush detyrën e tij për të garantuar qëndrueshmëri. Forca Evropiane e Xhandarmërisë, pjesa e Karabinierëve zbarkoi sonte që përkohësisht ta përforcojë Njësinë Policore të EULEX-it në Kosovë. EULEX do të vazhdojë që të mbështesë një mjedis të sigurt”, shkroi Borrell në Tëitter. Karabinierët do t’i bashkohen Njësisë Policore të Specializuar të EULEX-it, e përbërë prej 105 zyrtarëve policorë polakë, që kanë shtuar patrullimet në veri, ku nuk ka më pjesëtarë të policisë nga radhët e komunitetit serb, pas vendimit të Listës Serbe, subjektit kryesor të politikë të serbëve të Kosovës për t’u tërhequr nga institucionet e vendit, pas mospajtimeve rreth një vendimi të qeverisë qendrore në Prishtinë për t’i dhënë fund përdorimit të targave të makinave të lëshuara nga Serbia. Lajmi për përforcimin e njësive rezervë të EULEX-it, vjen në kohën kur presidenti i Serbisë, Aleksandar Vuçic, ka thënë se shpreson që ky mision dhe ai i NATO-s, KFOR, të marrë përgjegjësitë policore në katër komunat në veri të Kosovës. Më herët, misioni ie EULEXit tha se nuk ka marrë përsipër përgjegjësi policore në veri të Kosovës.