Në përmbyllje të vizitës në Kosovë, shefja e diplomacisë së Bashkimit Evropian, Kaja Kallas u ndal në Mitrovcën e Veriut. Teksa vizitoi edhe zyrën e EULEX-it, Kallas u shpreh se vizita në veri të vendit ishte e rëndësishme, për të parë dhe dëgjuar nga afër se çfarë ndodh në terren. “Është e rëndësishme të dëshmojmë vetë se çfarë po ndodh në terren dhe çfarë thonë njerëzit. Vizitova gjykatën që funksionon dhe që po pret kthimin e gjyqtarëve serbë. Gjithashtu u takova me përfaqësues të shkollave këtu për të kuptuar më mirë situatën, për të biseduar me qytetarët dhe për të parë me sytë e mi se çfarë ndodh në këtë pjesë”, deklaroi ajo. Qindra pjesëtarë të komunitetit serb në veri dhanë dorëheqje nga institucionet e Kosovës, përfshirë komunat, policinë, gjykatat dhe prokurorinë, në nëntor të vitit 2022, pas një vendimi të Qeverisë së Kosovës për t’i zëvendësuar targat serbe të makinave me targa të Kosovës. Ata u zëvendësuan me udhëheqës shqiptarë, pasi komuniteti shumicë serb në zonë i bojkotoi zgjedhjet.