Përfaqësuesja e Lartë e Bashkimit Evropian për Politikë të Jashtme dhe Siguri, Kaja Kallas, e cila ndodhet në Ballkanin Perëndimor për vizita zyrtare në Serbi, Kosovë dhe Maqedoninë e Veriut, tha se do të bisedojë me qeveritë dhe shoqërinë civile për “rrugën e tyre drejt BE-së”. Sipas saj, dialogu ndërmjet Beogradit dhe Prishtinës për normalizimin e marrëdhënieve është “domosdoshmëri për të lëvizur përpara” në këtë drejtim. “Tani është koha për riangazhim”, ka shkruar Kallas në llogarinë e saj, në platformën X. Kryediplomatja e BE-së vizitoi Serbinë dhe më pas mbërrin në Kosovë. Kallas tha në beograd se mesazhi i saj për autoritetet në Serbi ishte “i qartë”. “Dua ta shoh Serbinë duke ecur përpara drejt BE-së. Për ketë, liderët politikë duhet t’i përmbushin reformat e nevojshme dhe ta qartësojnë drejtimin e tyre strategjik. Kjo bëhet më së miri duke e rikthyer besimin dhe duke i qëndruar besnik parimeve demokratike”, shkroi Kallas në X. Në Beograd, ajo u takua me presidentin e Serbisë, Aleksandar Vuçiç, i cili tha se vendi i tij “mbetet partner i besueshëm për të gjithë që sinqerisht duan bashkëpunim, përparim dhe një të ardhme të përbashkët evropiane”. Presidenti i Serbisë pohoi në një postim në llogarinë e tij, në rrjetin social Instagram, se me Kallas ka biseduar për çështje kyçe gjeopolitike, për situatën e sigurisë në rajon, për rrugën evropiane të Serbisë dhe për dialogun me Kosovën. Vucic tha edhe se i kishte kujtuar kryediplomates së BE-së cështjen e asosacionit të komunave me shumicë serbe në kosovë.