Greqia po përgatitet të ashpërsojë ndjeshëm rregullat për pagesat me cash, si pjesë e një pakete të re ligjore që synon rritjen e transparencës financiare dhe luftimin e evazionit fiskal. Sipas projektligjit të Ministrisë së Ekonomisë dhe Financave, çdo transaksion me vlerë 500 euro e lart do të duhet të kryhet detyrimisht në mënyrë elektronike. Autoritetet do të llogarisin shumën totale të transaksionit dhe jo faturat e ndara, duke mbyllur kështu hapësirat për shmangie të taksave përmes pagesave të fragmentuara. Në rast shkeljeje, parashikohen masa të ashpra, si gjobë sa dyfishi i shumës së paguar në cash. Përveç kufizimeve për cash-in, paketa e re përfshin edhe masa të tjera fiskale, si lehtësime për dorëzimin me vonesë të deklaratave TVSH pa detyrime dhe rritje të kontrollit mbi transaksionet me kriptomonedha.