Top News -Jepet masa e sigurisë për dy zyrtarët/ Vlorë, falsifikuan e më pas vodhën dosjen e pronave

Në gjykatën e Vlorës është zhvilluar seanca për masën e sigurisë për dy punonjësit e Këshillit të Qarkut të Vlorës të arrestuar 3 ditë më parë për falsifikim dokumentacioni për disa prona në Dhërmi dhe për vjedhjen e dosjes nga zyrat e këshillit. Për Bardhyl Gjika, drejtor i Administrimit dhe mbrojtjes së Tokës pranë qarkut, gjyqtari Enkel Peza ka vendosur masën arrest me burg. Ndërsa për Kreshnik Minon, specialist pranë këtij institucioni, gjykata vendosi masën detyrim paraqitje. Për personin e tretë të arrestuar që është shtetasi Spiro Duni, masa pritet të mbahet në spitalin Rajonal të Vlorës, ku ai ndodht I shtruar për shkaqe shëndetësore. Ndaj tyre rëndon akuza e shpërdorimit të detyrës dhe falsifikim i dokumenteve zyrtare. Akuzë në këtë seancë u përfaqësua nga prokurori Alfredo Sali. Shtetasit e sipërpërmendur u arrestuan si pjesë e operacionit të koduar “Formulari” dhe dyshohet se disa ditë më parë kanë grabitur në zyrën e administrimit në qarkun e Vlorës dy dosje të pronave në Dhërmi dhe Himarë. Hetimi për tre shtetasit Bardhyl GJika, Kreshnik Mino dhe Spiro Duni kishte nisur prej disa muajsh. Në bashkëpunim me njëri-tjetrin zyrtarët publikë kanë falsifikuar formularët e pronësisë të një trualli në Dhërmi dhe më pas nga frika për të mos u arrestuar kanë hyrë të maskuar në zyrat e qarkut, duke thyer dyert me levë dhe më pas kanë marrë dosjet për të humbur gjurmët e falsifikimit të pronës në bregdet. Kujtojmë se ditën që ndodhi ngjarja ishte drejtori i kësaj zyre i cili denoncoi në media grabitjen e ndodhur, duke inskenuar gjithçka dhe për të humbur gjurmët e tij. Ndaj të arrestuarve hetimi po vijon nga prokuroria e Gjykatës së Vlorës, për veprat penale “Shpërdorimi i detyrës nga persona që ushtrojnë funksione publike” dhe “Falsifikimi i formularëve” e kryer në bashkëpunim.