Një letër nga kryeministri izraelit Benjamin Netanyahu tregon se cfarë fshihet pas shtytjes për të ristrukturuar marrëdhëniet ushtarake SHBA-Izrael. Sipas fjalëve të vetë Netanyahut, bëhet fjalë për një “plan të tij”. Letra, e shpërndarë në mediat sociale, zbulon se largimi nga ndihma ushtarake amerikane për Izraelin nuk është një reformë e udhëhequr nga SHBA-të, por një iniciativë izraelite e dorëzuar në Kongres për të marrë formë legjislative. Qëllimi nuk është që të zvogëlohet ndërveprimi amerikan me Izraelin, por të zëvendësohet ndihma e dukshme financiare me një formë shumë më të thellë dhe më pak të përgjegjshme të integrimit ushtarak. Letra që mban datën 1 qershor 2026, i drejtohet kongresmenit të Indianës, Marlin Stutzman, të financuar nga lobi izraelit, dhe u publikua së bashku me një deklaratë për shtyp që njoftonte një rezolutë të Dhomës së Përfaqësuesve të prezantuar nga Stutzman më 3 qershor. Në letër, Netanyahu shkruan se është “i inkurajuar” nga mbështetja e Stutzman për një plan për të “zhvilluar një Memorandum të ri Mirëkuptimi me qeverinë e Shteteve të Bashkuara” që do të zvogëlojë “ndihmën financiare ushtarake amerikane gjatë dekadës së ardhshme” dhe do ta zëvendësojë atë me “një kornizë të re të bashkëpunimit të përbashkët mbrojtës, bashkëzhvillimit, bashkëprodhimit dhe investimeve të ndërsjella” në fusha që përfshijnë mbrojtjen e avancuar nga raketat, inteligjencën artificiale, sistemet pa pilot, sigurinë kibernetike dhe platformat ushtarake të gjeneratës së ardhshme. Ndërkohë, edhe një legjislacion paralel po përparon në kongresin amerikan për bashkëpunimin në mbrojtje mes SHBA dhe Izraelit. Sipas Al Jazeera-s, ky legjislacion do t’i lidhte ushtritë amerikane dhe izraelite shumë ngushtë dhe do të hidhte themelet për zhvillimin e përbashkët të armëve, sipërmarrjet e përbashkëta ushtarako-industriale etj. Madje flitet edhe për integrimin e rrjetit dhe bashkimin e të dhënave, cka do të bënte që të dhënat ushtarake amerikane të ishin shumë të lexueshme nga ushtria izraelite.