Top News – Ish-kryeprokurori që fshehu pasurinë/ SPAK-dy vjet burg dhe 5 vjet pa funksion publik

Ish-kryeprokurori Adriatik Llalla rrezikon 2 vjet heqje lirie dhe 5 vjet përjashtim nga funksionet publike. SPAK ka kërkuar shpalljen fajtor të ish prokurorit për disa akuza, por më kryesorja fshehja e pasurisë. Ish prokurori i përgjithshëm, Adriatik Llalla akuzohet për veprat penale refuzim për deklarim, mos deklarim ose fshehje të deklarimit të pasurisë, në tre raste. Ndërkohë më herët ish prokurori është hetuar edhe pastrim parash, pretendime të cilat janë rrëzuar dhe aktualisht Adriatik Llalla gjykohet vetëm për fshehje të pasurisë. Sipas SPAK, Llalla akuzohet se e ka kryer këtë vepër penale tre herë. Prokurori i çështjes, Klodian Braho i kërkoi gjykatës deklarimin fajtor të Llallës për veprën penale të fshehjes së pasurisë dhe dënimin e tij me 2 vjet heqje lirie. Nëse gjendet fajtor Llalla do të përfitojë nga aplikimi i gjykimit të shkurtuar uljen e 1/3 së dënimit, duke mbetur si dënim përfundimtar në masën 1 vit e 4 muaj burgim. Akuza e ngritur sipas nenit 257/a, paragrafi i dytë parashikon dënime nga gjobë deri në 3 vjet burg. Gjithashtu ndaj Llallës u kërkua si dënim plotësues përjashtimi nga Shërbimi Publik për 5 vite. Më herët për shkak të dorëheqjes, ndaj Llallës është sanksionuar prej Kolegjit të Posaçëm të Apelimit ndalimi 15 vjet për të qenë pjesë e sistemit të drejtësisë.