Presidenti Donald Trump ka akuzuar Iranin për rrëzimin e një helikopteri amerikan pranë Ngushticës së Hormuzit dhe është zotuar se do t'i përgjigjet sulmit. Dy anëtarë të ekuipazhit të helikopterit Apache që u rrëzua pas sulmit u shpëtuan nga një dron detar amerikan, konfirmuan zyrtarët amerikanë për BBC-në. "Pati dy pilotë të përfshirë, të dy janë shëndoshë e mirë dhe të padëmtuar", shkroi presidenti në Truth Social. "Megjithatë, Shtetet e Bashkuara duhet, domosdoshmërisht, t'i përgjigjen këtij sulmi.", nënvizoi ai. Kjo është humbja e parë e një Apache që nga fillimi i konfliktit me Iranin dhe vjen pasi Trump më parë tha se Uashingtoni ishte pranë një marrëveshjeje me Teheranin për t’i dhënë fund konfliktit rajonal. Komanda Qendrore Amerikane (Centcom) tha më parë se dy "ushtarët u shpëtuan në mënyrë të sigurt brenda afërsisht dy orësh dhe janë në gjendje të qëndrueshme" pasi helikopteri i tyre AH-64 Apache u rrëzua "pranë bregdetit të Omanit ndërsa patrullonte ujërat rajonale". "Sapo jam informuar nga Ushtria jonë e Madhe se mbrëmë iranianët rrëzuan një nga helikopterët tanë shumë të sofistikuar Apache ndërsa patrullonin mbi Ngushticën e Hormuzit", shkroi Trump në rrjetet sociale të martën. Pak minuta para komenteve të Trump, kryenegociatori iranian, Mohammad Baqer Qalibaf, postoi në rrjetet sociale: "Ne preferojmë gjuhën e diplomacisë, por flasim gjuhë të tjera shumë më rrjedhshëm. Thyejini angazhimet tuaja dhe ne do të kalojmë në atë që flasim më mirë."