Luftërat në Lindjen e Mesme dhe Ukrainë pritet të dominojnë samitin e G7-ës javën e ardhshme, ndërsa Franca, vendi pritës, harton një axhendë që synon projektimin e unitetit dhe shmangien e përballjes me Presidentin amerikan, Donald Trump. Takimi që do të mbahet nga 15 deri më 17 qershor në Evian-les-Bains, në bregun e Liqenit të Gjenevës, bashkon udhëheqësit e Francës, Britanisë, Kanadasë, Gjermanisë, Italisë, Japonisë dhe Shteteve të Bashkuara, së bashku me Bashkimin Evropian. Me Trumpin që po përpiqet t'i japë fund një lufte që ka goditur ekonominë globale dhe është i frustruar me aleatët evropianë që sipas tij e kanë zhgënjyer në Gjirin Persik dhe janë bërë tepër të varur nga SHBA-ja për nevojat e tyre të sigurisë, diplomatët thonë se menaxhimi i krizave do të jetë në fokus. Nuk priten kështu vendime të rëndësishme për çështjet kryesore, që përfshijnë gjithashtu trajtimin e çekuilibrave ekonomikë globalë dhe furnizimin me minerale kritike. Grupi, i themeluar gjysmë shekulli më parë, tradicionalisht ka trajtuar sfidat ekonomike dhe gjeopolitike, me konsensus të gjerë. Por ky kohezion është dobësuar që kur Trump u kthye në Shtëpinë e Bardhë në vitin 2025.