Autoritetet e Kosovës kanë konfirmuar se një i burgosur serb është arratisur nga Qendra e Paraburgimit në Mitrovicë pasditen e 7 gushtit. Bëhet fjalë për Gjorgje Radomiroviçin, i dënuar me 14 vjet e 6 muaj burg për vrasje, nga të cilat i kishin mbetur për të vuajtur edhe 3 vjet e 7 muaj. Sipas autoriteteve të Kosovës, shtetasi serb u arratis teksa ndodhej në hapësirat e punëtorisë së qendrës. Ai ishte përfshirë në listën e të dënuarve që mund të përfitonin nga lirimi me kusht. Pas arratisjes, janë pezulluar nga detyra drejtori i qendrës, një mbikëqyrës i lartë dhe dy zyrtarë korrektues. Shërbimi Korrektues ka nisur hetime të brendshme për të zbardhur rrethanat e rastit dhe ka premtuar masa konkrete për adresimin e situatës. Pas konstatimit të mungesës së tij, policia e Kosovës ka intensifikuar kërkimet për kapjen e të arratisurit, duke vendosur pika kontrolli në të gjithë pjesën veriore të vendit, zonë e banuar kryesisht nga komuniteti serb.