Prokuroria Themelore në Gjakovë ka kërkuar një muaj paraburgim për katër serbët e arrestuar në fundjavë në qytetin jugperëndimor të Kosovës, duke i akuzuar për shkelje të ligjit të armëve. Në një njoftim për media, Prokuroria tha se të dyshuarit kishin mbajtur armë të ftohta gjatë vizitës së tyre në disa nga Manastiret Ortodokse në Kosovë të shtunën. Sipas njoftimit, në makinën me të cilin po udhëtonin ata, e tipit Toyota, Policia e Kosovës gjeti një sëpatë, një thikë me këllëf, dhe një thikë sharrë. Ata akuzohen se kishin tejkaluar shpejtësinë e lejuar në atë zonë dhe nuk kishin deklaruar se në makinën e tyre kishin armë të ftohta. “Me këto veprime formohet dyshimi i bazuar se të pandehurit kanë kryer veprën penale mbajtja në pronësi, kontroll ose posedim të paautorizuar të armëve”, tha Prokuroria.