Kryeministri grek, Kiriakos Mitsotakis priti të hënën Kryepeshkopin e Athinës dhe të gjithë Greqisë Jeronimon. Në një diskutim të shkurtër të zhvilluar para kamerave televizive, Mitsotakis iu referua humbjes së fundit të Kryepeshkopit Anastas të Shqipërisë, i cili ndërroi jetë të shtunën. "Janë ditë të vështira për ortodoksinë në tërësi. Besoj se të gjithë jemi prekur nga humbja e Kryepeshkopit të Shqipërisë. Pata fatin ta njoh personalisht. Ai ishte vërtet një hierark i madh dhe një njeri i madh, i cili arriti punë e pakrahasueshme në Shqipëri, në thelb rindërtimi i një kishe të shkatërruar, por para së gjithash ai ishte një njeri i Zotit që kujdesej për njerëzit ne do të marrim pjesë në varrimin e tij në Tiranë për ta nderuar siç e meriton”, tha Kryeministri grek. Edhe kryepeshkopi grek shprehu vlerësimet për Anastas Janullatosin dhe kontributin e dhënë prej tij në ringritjen e kishës ortodokse shqiptare. Mediat greke shkruajnë se kryeministri dhe kryepeshkopi kanë diskutuar më tej edhe për çështje aktuale që kanë të bëjnë me marrëdhëniet mes kishës dhe shtetit, veçanërisht çështjet sociale.