BE shprehur keqardhje për vendimin e Kosovës që të hapë zyrtarisht Ambasadën e saj në Jerusalem. Një zëdhënës i bllokut u shpreh se ky hapë përbën një “largim të Prishtinës nga qëndrimi i BE-së lidhur me çështjen e Jerusalemit”.“Pozicioni i Bashkimit europian është i njohur mirë dhe në përputhje me Rezolutën e Këshillit të Sigurimit të OKB-së 478, e vitit 1980, që i kërkon të gjitha vendeve të organizatës së Kombeve të Bashkuara të tërheqin misionet e tyre diplomatike nga Jerusalemi. Të gjitha shtetet e BE-së, sikur edhe delegacioni i BE-së në Izrael, janë të vendosura në Tel Aviv”, theksoi zëdhënësi. Ai shtoi se Brukseli e ka përsëritur vazhdimisht përkushtimin e qartë për një zgjidhje të negociuar të dy shteteve, të ndërtuar mbi parametrat e pranuar ndërkombëtarë dhe të drejtën ndërkombëtare”. BE-ja rikujton se shefat e shteteve apo qeverive të bllokut, në samitin e tyre më 2017 kishin përsëritur se “pozicioni i BE-së rreth Jerusalemit mbetet i pandryshuar”.“Pozicioni afatgjatë i bllokut është i qartë. Duhet të gjendet mënyra për zgjidhjen e statusit të Jerusalemit përmes negociatave, si një kryeqytet i ardhshëm i të dyja shteteve dhe të përmbushen aspiratat e të dyja palëve. Çështja e Jerusalemit është çështje e statusit final. Në këtë kontekst, çfarëdo hapi diplomatik i cili vë në dyshim qëndrimin e përbashkët të BE-së, është çështje për shqetësim serioz dhe keqardhje”, deklaroi zëdhënësi. Ndqërkohë lidhur me njoftimet e hapjes së një zyre të Ambasadës së Çekisë – shtet anëtar i BE-së, në Jerusalem, nga Brukseli nuk ka ndonjë përgjigje të qartë.