Izraeli ka vazhduar të bombardojë Rripin e Gazës edhe të martën, ndërsa ka thënë se fushata e tij për të shkatërruar Hamasin, e ka cuar grupin palestinez “në prag të shpërbërjes”. Organizatat humanitare druajnë ndërkohë se Gaza mund të kthehet shpejt në një zonë sëmundjesh dhe urie, ndaj po shtojnë presionin diplomatik ndaj Izraelit që të bëjë më shumë përpjekje për të mbrojtur civilët. Hamasi tha të martën se përleshje janë regjistruar në qendër të Gazës, ndërsa dëshmitarët kanë raportuar për sulme vdekjeprurëse izraelite në jug të territorit. Sulmet ajrore izraelite kanë lënë të vdekur të paktën 12 persona në qytetin jugor Rafah, afër kufirit me Egjiptin, ku dhjetëra mijëra njerëz tentojnë të strehohen, ka raportuar agjencia palestineze e lajmeve Ëafa. Sulmet e së hënës ndërkohë shënjestruan qytetin kryesor jugor Han Junis, i cili është kthyer në epiqendër të luftimeve. “Hamasi është në prag të shpërbërjes, ushtria po merr kontrollin e bastioneve të fundit”, tha ndërkohë ministri izraelit i Mbrojtjes, Yoav Gallant.