Pulat që ngordhën si pasojë e gripit të shpendëve në Durrës, janë groposur gjatë mesnatës larg zonave të banuara në Bashkinë e Shijakut. Prej 5 ditësh shpendët e ngordhura qëndruan në tokë, pasi autoritetet nuk kishin përcaktuar vendin e groposjes së tyre, duke rritur kështu rrezikun që infeksioni të përhapej jo vetëm në Durrës, por edhe më tej. Rreth 500 mijë pula ngordhën si pasojë e gripit të shpendëve, e njohur ndryshe si Influenca Aviare e tipit H5N8. Groposja e tyre duhet të ishte bërë që në momentin e parë ku u dyshuar se ata ishin prekur nga një grip i rrezikshëm, mirëpo kjo gjë vonoi 5 ditë. Bëhet me dije se pas groposjes vendi është dezinfektuar me solucionet përkatëse për të shmangur çdo problem infeksioni. Ky skandal u raportua edhe më parë nga Shoqata për Mbrojtjen e Konsumatorit dhe Prodhuesit Vendor, por nuk u mor parasysh nga autoritetet përkatëse. Që prej përhapjes së këtij lajmi, qytetarëve u është kërkuar që të shmangin kontaktin me pulat e ngordhura apo ato të sëmura, dhe në rast se do të konsumojnë një të tillë, ta pjekin atë në temperaturën 70 gradë. Nga ana tjetër, institucioni që duhet të garantojë ushqime cilësorë deri më tani nuk ka bërë asnjë reagim nëse vezët e këtyre kompanive që janë në treg janë të sigurta ose jo.