Kushtet e vështira, ushqimi i keq dhe mënyra e jetesës, ka ngritur në grevë urie disa shtetas të huaj, të cilët ndodhen në qendrën e mbyllur të Karreçit në Durrës. Grevistët të cilët janë kryesisht shtetas sirianë, afganë, iranianë dhe marokenë, shprehin pakënaqësitë për kushtet e këqija në të cilat mbahen, ndërkohë që kanë hyrë në vendin tonë duke synuar të shkojnë në vendet e Bashkimit Evropian për një jetë më të mirë dhe të sigurt. “Ne, tre afganë, nisëm sot grevën e urisë. Situata nuk është aspak e mirë këtu dhe autoritetet shqiptare nuk i janë përgjigjur kërkesave tona. Kemi probleme me motin. Është ftohtë. Kemi probleme dhe me ushqimin. Jemi këtu për shkak të situatës së keqe në Afganistan dhe duam të shkojmë në Evropë, por ata na sollën këtu. Do ta vijojmë grevën derisa qeveria shqiptare të na përgjigjet.”