Policia greke njoftoi se përmes një aksioni të përbashkët me autoritetet gjermane ka shkatërruar një grup të trafikut ndërkombëtar të drogës, përgjegjës për shpërndarjen e lëndës narkotike pothuajse në të gjitha vendet e BE-së. Nga aksioni janë arrestuar dy persona në Greqi, që dyshohet se janë edhe drejtuesit e grupit, ndërsa në Gjermani u prangosën tre të tjerë. Në kërkim janë shpallur tetë persona të tjerë, që janë identifikuar tashmë si pjesë e bandës së trafikut të drogës. Disa prej tyre dyshohet se fshihen në Spanjë, nga ku trafikohej droga në drejtim të Greqisë dhe më pas vendeve të tjera të BE. Hetimet e autoriteteve greke dhe gjermane vlerësojnë se vetëm në një rast, vlera e drogës që ka trafikuar ky grup ishte mbi 5 milionë euro. Aksioni pason operacionin e ndërmarrë në Kretë gjatë së dielës, ku u arrestuan 15 persona, mes të cilëve edhe personel ushtarak dhe oficerë policie, që dyshohen si anëtarë të një grupi trafiku droge, emigrantësh dhe gjobëvënieje që vepronte në ishull.