Greqia dhe Turqia zhvilluan raundin e 5-të të diskutimeve mbi një plan të përbashkët veprimi në kuadër të një "agjende pozitive" midis dy vendeve. Kështu theksohej në një deklarate të përbashkët të lëshuar nga Ministria e Jashtme pas takimeve të mbajtura në Athinë të hënën dhe të martën. Në takimin e parë mes Zëvendës Ministrave të Jashtëm Konstantinos Fragogiannis dhe ambasadorit Burak Akcapar të hënën, të dyja palët "riafirmuan qëllimin e tyre të përbashkët për të siguruar rezultate konkrete për takimin e 5-të të Këshillit të Bashkëpunimit të Nivelit të Lartë (HLCC) që do të mbahet më 7 dhjetor në Selanik. Pikat e agjendës së këtij takimi do të jenë biznesi, ekonomia, turizmi, transporti, energjia, shkenca dhe teknologjia, bujqësia, mjedisi, sigurimet shoqërore dhe shëndetësia, rinia, arsimi dhe sporti.