Gjykata Themelore në Prishtinë ka caktuar një muaj paraburgim ndaj shtatë drejtorëve të institucioneve paralele serbe arsimore dhe shëndetësore në Kosovë, nën dyshimin se kanë ndikuar në vullnetin e lirë të votuesve. Sipas gjykatës, ndaj drejtorëve është caktuar masae paraburgimit pasi ekziston rreziku që nëse lihen të lirë mund të arratisen, ose të përsërisin veprat penale. Lidhur me këtë vendim ka reaguar Lista Serbe, e cila e ka dënuar duke thënë se bëhet fjalë për “përndjekje dhe frikësim të serbëve dhe serbeve të ndershme”. “Në këto kohë të vështira duhet të tregojmë dinjitet, rezistencë dhe unitet kundër atyre për të cilët asgjë nuk është e shenjtë, dhe të cilët janë të gatshëm që për interesa personale dhe privilegje politike të godasin edhe popullin e tyre”, reagoi Lista Serbe.