Një gjuhë e fshehtë e lindur në botën e krimit rus dhe e përdorur dikur për të mashtruar rojet e burgjeve sovjetike, sot është bërë pjesë e përditshmërisë së miliona njerëzve. Bëhet fjalë për Fenya, zhargoni i hajdutëve dhe të burgosurve, i cili u zhvillua ndër shekuj si një mënyrë komunikimi e koduar mes grupeve kriminale. Përhapja masive e saj lidhet me periudhën sovjetike. Në kampet e punës dhe burgjet e sistemit Gulag, ku përfshiheshin kriminelë, intelektualë dhe kundërshtarë politikë, Fenya u bë një mjet mbijetese dhe komunikimi. Miliona të burgosur u njohën me këtë zhargon, ndërsa pas amnistive të mëdha të viteve 1950, shumë prej tyre e morën gjuhën me vete jashtë burgjeve, duke e përhapur në shoqëri.