Një pasdite në fillim të marsit, tre ditë pas përballjes katastrofike mes Donald Trump dhe Volodymyr Zelenskit në Shtëpinë e Bardhë, pati një fluks telefonatash në ambasadën ukrainase në Londër. Ekipi i JD Vance ishte në linjë dhe donte të fliste me Valerii Zaluzhnin, ambasadorin e Ukrainës në Mbretërinë e Bashkuar dhe ish-komandantin e përgjithshëm të ushtrisë. Zëvendëspresidenti amerikan kishte luajtur një rol të rëndësishëm në provokimin e konfrontimit mes Trump dhe Zelenskit në Zyrën Ovale. Tani, Vance dhe të tjerë në orbitën e Trump me sa duket po kërkonin alternativa të mundshme për Zelenskin problematik. Ekipi i Vance "provoi kanale të ndryshme" për t'u lidhur me Zaluzhnyin, tha një burim për Guardian. Zaluzhni, pas konsultimit me shefin e shtabit të Zelenskit, refuzoi të merrte telefonatën. Episodi pasqyronte litarin e tendosur politik mbi të cilin Zaluzhni ka ecur që kur Zelenski e shkarkoi atë nga detyra e shefit të ushtrisë, shkurtin e kaluar dhe e dërgoi në Londër. Nga njëra anë, i mësuar të punojë brenda një hierarkie të rreptë ushtarake, Zaluzhni mbetet besnik ndaj qeverisë së cilës i shërben. Nga ana tjetër, shumë - si brenda ashtu edhe jashtë vendit - e shohin atë si presidentin e ardhshëm të Ukrainës dhe po e shtyjnë të nisë një fushatë politike. Për sa kohë që Ukrainë është në luftë, nuk pritet të mbahen zgjedhje pasi votimi, ligjërisht dhe teknikisht është i pamundur. Edhe kundërshtarët më të vendosur të Zelenskit, nuk i mbështesin zgjedhjet tani. Por të gjithë në ukrainë e dinë, se herët a vonë, politika do të kthehet. E kur kjo të ndodhë, sondazhet sugjerojnë se Zaluzhni, që udhëhoqi zbrapsjen me sukses të sulmit rus në fillim të luftës, është i vetmi kandidat që do të përbënte një kërcënim serioz për Zelenskin.