Marrëdhëniet mes Serbisë dhe Malit të Zi janë tensionuar sërish, këtë herë për shkak të 20-vjetorit të rikthimit të pavarësisë së Malit të Zi. Debati nisi pas deklaratës së presidentit serb Aleksandar Vuçiç, i cili tha se Mali i Zi po “feston shkëputjen nga Serbia” dhe se nuk do të merrte pjesë në ceremonitë festive të organizuara në Podgoricë. Pas deklaratave të Vuçiçit, Ministria e Jashtme e Malit të Zi reagoi ashpër, duke theksuar se retorika e presidentit serb “nuk kontribuon në marrëdhënie të mira fqinjësore”. Sipas Podgoricës zyrtare, Mali i Zi nuk është “shkëputur nga Serbia”, por ka rikthyer pavarësinë përmes një referendumi demokratik dhe në përputhje me të drejtën ndërkombëtare. Nga ana tjetër, Ministria e Jashtme e Serbisë akuzoi Malin e Zi se po sulmon pa arsye Vuçiçin, duke theksuar se presidenti serb vetëm ka shprehur mendimin e tij personal dhe nuk ka ofenduar askënd. Beogradi kujtoi gjithashtu se Serbia e njohu menjëherë pavarësinë e Malit të Zi pas referendumit të vitit 2006.