Entiteti serb i Bosnjë e Hercegovinës, Republika Sërpska, po shënon “ditën kombëtare”, një festë antikushtetuese, në një kohë kur paralajmërimet ndërkombëtare për rrezikun nga synimet politike të liderit të entitetit, Millorad Dodik, për shkëputje nga Bosnja, po intensifikohen. Nëntë janari shënon ditën kur serbët e Bosnjës më 1992, të cilët e kundërshtuar pavarësinë e Bosnjës pas shkëputjes së saj nga Jugosllavia, shpallën shtetin e tyre të ndarë, duke nxitur një luftë ndëretnike e cila i mori jetën më shumë se 100.000 njerëzve dhe u ndal vetëm pas Marrëveshjes së Dejtonit, të ndërmjetësuar nga Shtetet e Bashkuara, në fund të vitit 1995. Sipas Marrëveshjes së Dejtonit, Bosnja administrohet nga një Qeveri qendrore nën udhëheqjen e një federate boshnjake dhe kroate dhe një entiteti me shumicë serbe, i njohur si Republika Sërpska. Në entitetin serb të Bosnjës, 9 janari shënohet si ditë kombëtare, megjithëse Gjykata Kushtetuese e Bosnjë e Hercegovinës e ka shpallur atë festë antikushtetuese dy herë. Kjo festë e ndaluar është shënuar në kryeqytetin e entitetit serb, Banjallukë, me marshime dhe parada të policisë së armatosur. Në këtë festë kanë konmfirmuar pjesmarrjen ministri serb i Mbrojtjes, Millosh Vuçeviç, shefi i Shtabit të Përgjithshëm të Ushtrisë Serbe, Millan Mojsilloviç, ministrat e Qeverisë së Serbisë, kryetari i Kuvendit të Serbisë, Vladimir Orliç, dhe patriarku e Kishës Ortodokse Serbe, Porfirije. Edhe anëtarët e klubit të motoçiklistëve “Ujqit e Natës”, i cili është i afërt me Putinin, pritet të marrin pjesë në paradë sic kanë bërë edhe vitet e shkuara. Gjatë dy vjetëve të fundit, Dodik, i cili ka lidhje të ngushta me presidentin e Rusisë, Vladimir Putin, është përpjekur vazhdimisht ta dëmtojë autoritetin e Qeverisë qendrore të Bosnjës dhe të themelojë institucione paralele për t’i rritur kërcënimet e tij të kamotshme për ta ndarë vendin përherë. Për ta mbështetur sovranitetin dhe integritetin territorial të Bosnjës, dy avionë luftarakë amerikanë, F-16, fluturuan mbi qiellin e këtij vendi një ditë më parë.