I dërguari amerikan për Ballkanin Perëndimor, Gabriel Escobar dhe i dërguari i posaçëm i Bashkimit Europian për dialogun mes Kosovës dhe Serbisë, Miroslav Lajçak mbërritën të martën në Prishtinë, për të bindur Kosovën dhe Serbinë që të arrijnë një marrëveshje për targat e automjeteve t në kufi. Escobar u prit nga presidentja Vjosa Osmani me të cilën pati një takim i cili zgjati më shumë se 2 orë. Ky takim, i cili ka qenë i mbyllur për mediet, ka përfunduar pa deklarata për shtyp. Megjithatëm, përmes një njoftimi në Facebook, Osmani ka shkruar se Kosova do të vazhdojë të jetë palë konstruktive, e barabartë dhe e përkushtuar në procesin e dialogut “Në takim me të dërguarin e posaçëm të Shteteve të Bashkuara për Ballkanin Perëndimor, Gabriel Escobar, theksova se Kosova do të vazhdojë të jetë palë konstruktive, e barabartë dhe e përkushtuar në procesin e dialogut, duke kontribuar për paqe dhe stabilitet në vend dhe rajon”, shkruan Osmani. Ajo thotë se institucionet e Kosovës janë në komunikim dhe koordinim të vazhdueshëm me partnerët ndërkombëtarë.