Nëna e bosit meksikan të krimit, të dënuar në SHBA, Joaquin El Chapo Guzman, është ndarë nga jeta pasi ka qëndruar javët e fundit në një klinikë private, raportuan mediat lokale. El Sol de Sinaloa, një gazetë lokale në Sinaloa, raportoi se Consuelo Loera ishte 94 vjec. Media të tjera meksikane, si e përditshmja kombëtare el Universal, citonin autoritetet e sigurisë që konfirmonin vdekjen e saj. Djali i Consuela Loeras, për vite të tëra udhëhoqi kartelin sinaloa, organizatën e fuqishme kriminale me lidhje në gjithë globin, që ka trafikuar dhjetëra tonë drogë në shumë kontinente. Ky kartel, fajësohet për vdekjen e mijëra njerëzve në meksikë, që nga anëtarët e bandave rivale, e deri tek qytetarët e thjeshtë, policët dhe pjesëtarët e forcave të armatosura. Guzman u dënua për vrasje dhe trafik droge në shtetet e bashkuara të amerikës në 2019-ën dhe po kryen atje dënimin me burg të përjetshëm në një institucion të sigurisë së lartë në Kolorado. Loera u vendos në qendër të vëmendjes në 2020-ën, kur presidenti meksikan Andres Manuel Lopez Obrador, i shtrëngoi dorën asaj në një vizitë në badiraguato, një lokalitet në sinaloa, ku fëmijët e saj kishin lindur dhe ishin rritur. Presidenti e mbrojti veten në atë kohë duke thënë se kish qenë cështje mirësjelljeje dhe e kishte quajtur Loeran një grua të respektueshme.