Kryeministri i Kosovës, Albin Kurti, nga Austria ku ai po merr pjesë në samitin e social demokratëve evropianë, tha se kosova e ka gati aplikimin për anëtarësim në BE. Kurti tha në Vjenë se Ballkani Perëndimor ka nevojë për një proces të përshpejtuar për anëtarësimin në Bashkimin Evropian. Ai përgëzoi BE-në, që në Samitin e Tiranës rikonfirmoi angazhimin e saj për anëtarësimin e Ballkanit Perëndimor. “Kemi nevojë për proces të përshpejtuar për anëtarësim në BE, nuk mjafton ‘perspektiva në BE’. Është e vështirë të mobilizohen njerëzit nëse nuk ka afate të qarta kohore drejt anëtarësimit. Tani është koha për të përshpejtuar procesin e zgjerimit, me më shumë iniciativa dhe investime në rajon që përfitojnë njerëzit”, tha Kurti. Po ashtu Kurti bëri të ditur se Kosova do të aplikojë në BE para Krishtlindjeve. “Po ashtu, dua t’ju informoj se këtë muaj, para Krishtlindjeve, Kosova do të aplikojë për anëtarësim në BE,” tha ai para socialdemokratëve evropianë.