Kim Jong Un inspektoi një uzinë të re që prodhon materiale bërthamore të nivelit të armëve dhe tha se Pheniani planifikon të “forcojë arsenalin bërthamor të shtetit tonë me një ritëm eksponencial”, sipas një raporti nga media shtetërore. Udhëheqësi i Koresë së Veriut tha se vendi i tij ka më shumë se dyfishuar kapacitetin e tij për të prodhuar materiale bërthamore të nivelit të armëve në pesë vitet e fundit dhe se uzina e re do të ndihmojë në forcimin e arsenalit bërthamor, sipas raportit nga Agjencia Qendrore Koreane e Lajmeve, KCNA. Kim nisi shtytjen për më shumë armë bërthamore sipas një plani pesëvjeçar që u zbatua pasi bisedimet për denuklearizimin me Shtetet e Bashkuara, përfshirë tre takime me Presidentin e SHBA-së Donald Trump gjatë mandatit të tij të parë, përfunduan pa sukses. Lajmi për centralin e ri bërthamor të Koresë së Veriut vjen ndërsa Uashingtoni po përpiqet të arrijë një marrëveshje për t'i dhënë fund luftës disamujore me Iranin dhe për të bindur Teheranin të heqë dorë nga materialet bërthamore që mund të cojnë në armë bërthamore. Koreja e Veriut tashmë ka material bërthamor të mjaftueshëm për deri në 90 koka bërthamore dhe besohet se ka mbledhur rreth 50, sipas një raporti të Shërbimit Kërkimor të Kongresit amerikan. Agjencia Ndërkombëtare e Energjisë Atomike raportoi në mars se Koreja e Veriut ka të paktën dy centrale aktive të pasurimit bërthamor, një në Yongbyon dhe një tjetër në Kangson.