Pas shpalljes së vendimit të shkallës së parë nga Gjykata Shtetërore e Bosnjë dhe Hercegovinës, e cila e dënon me një vit burg për mosrespektim të vendimeve të përfaqësuesit të lartë ndërkombëtar, presidenti i entitetit Republika Serbe, Milorad Dodik, deklaroi se nuk do të tërhiqet nga pozita dhe nuk do të lejojë mbajtjen e zgjedhjeve të parakohshme. “Do të vazhdoj të jem president i Republikës Serbe. Ky është vullneti i popullit dhe askush nuk do ta ndryshojë këtë fakt me vendime politike të orkestruara,” deklaroi Dodik në një konferencë për shtyp në Banja luka, duke shtuar se procesi gjyqësor kundër tij është “i motivuar politikisht”. Pavarësisht vendimit të gjykatës, Dodik theksoi se dënimi nuk është ende i formës së prerë dhe se ai do të ndjekë të gjitha rrugët ligjore për të apeluar këtë vendim. Sipas vendimit, në rast se dënimi konfirmohet nga gjykata e apelit, Dodik do të ndalohet të mbajë funksion publik për një periudhë prej gjashtë vjetësh, duke përfshirë edhe postin aktual të presidentit të Republikës Serbe.