Disneyland-i në Kaliforni u rihap të mërkurën pas 10 muajsh i mbyllur për shkak të pandemisë, por këtë radhë, nuk është më një park tematik, por një qendër gjiganTe vaksinimi. Rreth 100 pacientët e parë që patën fatin të prenotonin online vaksinën, iu drejtuan parkingut të resortit, ku persona mbi moshën 65 vjeç dhe punonjës të kujdesit shëndetësor, po imunizohen në disa tenda të bardha. “Sot, për shumë njerëz që po vaksinohen, ky është me të vërtetë vendi më i lumtur në botë”, shprehet dikush. Autoritetet lokale kishin bërë të ditur se Disneylandi do të kthehej në një qendër të madhe vaksinimi, të hënën në mbrëmje, dhe morën 10 mijë prenotime vetëm në dy orët e para të së martës. Fushata e vaksinimit në Kaliforni është kritikuar jo pak pasi shteti ka patur shkallën më të ulët të imunizimit për frymë në SHBA. Zyrtarët lokalë thanë të mërkurën se kriteret e mëparshme strikte të përzgjedhjes, do të zgjeroheshin menjëherë, për të përfshirë të gjithë personat mbi moshën 65 vjeç. Shumë shpejt ata planifikojnë që në Disneyland të administrojnë mbi 7 mijë vaksina në ditë. Gjatë verës dhe vjeshtës, kur rastet e koronavirusit u shtuan shumë në Kaliforni, Disney dhe parqe të tjera tematikë qëndruan të mbyllur.