Ambasadori i Bashkimit Evropian në Kosovë, Aivo Orav zhvilloi një takim me të dërguarin e ri të Bashkimit Evropian për dialogun mes Kosovës dhe Serbisë, Peter Sorensen. Ai tha se në dallim nga Lajçak, Sorensen do të merret vetëm me dialogun dhe jo me çështje të tjera të Ballkanit, ndërsa u zotua se do ta mbështes plotësisht atë, Në një postim në platformën X, Orav tha se beson që përvoja diplomatike e Sorensenit do t’i ndihmojë në avancim të normalizimit të marrëdhënieve në mes të Kosovës dhe Serbisë. Sorensen është angazhuar në Kosovë, në kuadër të Misionit të Organizatës së Kombeve të Bashkuara (UNMIK), si dhe në role tjera, në Serbi, Maqedoni të Veriut dhe Bosnjë e Hercegovinë. Ai është një njohës i mirë i rajonit dhe situatës mes Beogradit dhe Prishtinës. Fokusi në dialog pritet të jetë në zbatimin e marrëveshjes për normalizim të marrëdhënieve, të arritur mes dy palëve në shkurt të vitit 2023. Palët negociojnë prej vitit 2011 dhe kanë arritur një mori marrëveshjesh, por jo të gjitha janë zbatuar mes tyre.