Zëvendëskryeministri në detyrë Besnik Bislimi ka fajësuar palën serbe për dështimin e formimit të komisionit për të pagjeturit në raundin e radhës të bisedimeve të zhvilluara këtë të enjte në Bruksel në kuadër të procesit të dialogut. Ai në konferencën për media të mbajtur pas takimeve ka treguar mbi detajet e diskutimeve. Bislimi tha se ishte planifikuar themelimi i Komisionit të Përbashkët për personat e zhdukur me forcë dhe mbajtja e një takimi tjetër në të cilin Kosova dhe Serbia duhet të dilnin me propozime konkrete. “Serbia është tërhequr nga marrëveshja për termat e referencës të cilën e kemi përfunduar në fund të dhjetorit të vitit të kaluar, duke thënë se ata duan që edhe njëherë të ndërhyjnë në dokument, gjë që nuk është pranuar as nga Brukseli as nga pala jonë”, ka thënë Bislimi.