Hyjnë në fuqi rregullat e reja të lundrimit me anije, jaht dhe për sportet detare. Vendimi i qeverisë do të zbatohet nga të gjitha ata operatorë që kryejnë aktivitet me mjete lundruese për qëllime turistike dhe argëtimi, si dhe për motorët e ujit, për rafting, kanoe, zhytje etj. Bizneset që do të kryejnë këto aktivitete duhet të jenë të licencuar si “operatorë turistikë” dhe të certifikuar nga Ministria e Turizmit. Vendimi përcakton se për ata operatorë të turizmit detar, në rastin kur jahtin ose mjetin e vogël lundrues e jep me qira apo me kontratë “bareboat” apo “çarter me kohë”, është i detyruar që të njoftojë Zyrën e Regjistrimit të Mjeteve Lundruese Shqiptare pranë kapitanerisë së portit përkatës. Njoftimi duhet të bëhet me e-mail ose duke ngarkuar në sistemin elektronik një kopje të kontratës të qirasë. Për mjete me kapacitet mbi 12 pasagjerë, drejtimi i tyre do të lejohet të kryhet vetëm nga personeli i kualifikuar dhe i autorizuar, sipas parashikimeve ligjore. Për mjetet me kapacitet nën 12 pasagjerë, lejohet që shërbimet plotësuese, të bordit, të ambienteve të brendshme dhe të kuzhinës të kryhen nga persona, në cilësinë e vizitorit, me kusht që të kenë mbushur moshën 17 vjeç – shkruan monitor. Për motorët e ujit, parashikohet që gjatë periudhës prill-nëntor lundrimi i tyre të jetë deri në 500 metra larg bregut, por me shpejtësi të lejuar deri në 10 nyja. Operatori i turizmit detar që ushtron lundrimin turistik me jaht apo anije është i detyruar të ushtrojë aktivitetin e tij në vende të lejuara, sipas zonave të publikuara nga ministria përgjegjëse për turizmin; të marrë përsipër zbatimin e Kodit të Etikës, miratuar me urdhër të ministrit përgjegjës për turizmin, nëpërmjet nënshkrimit të një vetëdekarimi; të disponojë pajisje për regjistrimin elektronik të listës së ekuipazhit dhe të pasagjerëve, që përfshin lidhjen në internet; të raportojë listën e ekuipazhit e të pasagjerëve para çdo udhëtimi në sistemin elektronik, sipas parashikimeve ligjore në fuqi; t’i dorëzojë klientit mjetin lundrues, sipas parashikimeve të kontratës së qirasë.