Në datën 1 Korrik fillon faza e dytë e procesit të Fiskalizimit, ajo e transaksioneve pa para në dorë ndërmjet bizneseve. Megjithatë edhe pse na ndajnë vetëm pak ditë nga fillimi i fazës së dytë të fiskalizimit, bizneset janë ende shumë larg përmbushjes së kritereve për fillimin e fiskalizimit. Implementimi i këtij procesi po bëhet në mënyrë graduale, me faza, në mënyrë që edhe bizneset të kenë mundësi që të integrohen në sistemin e ri fiskal. Të gjithë tatimpaguesit që përfshihen në procesin e fiskalizimit, duhet të pajisen në kohë me certifikatën elektronike. Çertifikata Elektronike, për projektin e Fiskalizimit është një nga elementët e domosdoshëm që siguron përdorimin e portalit të Faturës Elektronike dhe kryerjen e veprimeve me të. Kjo certifikatë është e vlefshme për një vit dhe ka një kosto prej 4 mijë lekësh në vit nga koha e gjenerimit të certifikatës.