43 nga 61 bashkitë e vendit kanë përfunduar procesin e identifikimit të zonave për zhvillim në kuadër të ‘Paketës së Maleve’. Të dhënat e publikuara nga autoritetet vendore tregojnë se në total janë 369 zona të miratuara për zhvillim në kuadër të kësaj nisme. Bashkia me më shumë zona është Berati me 44 zona të miratuara, ndjekur nga Selenica në Qarkun e Vlorës me 36 zona dhe Shijaku në Qarkun e Durrësit me 20 të tilla. Te 43 bashkitë që kanë miratuar zonat e zhvillimit janë regjistruar gati 9 mijë kërkesa interesimi, ndërsa rreth 900 prej tyre janë konkretizuar me aplikime pranë institucioneve vendore. Sipas ligjit, bashkitë kanë rolin kryesor në ndjekjen e procedurave për investimet në kuadër të Paketës së Maleve, teksa pushteti qendror ka vetëm rolin e rregullatorit. Ligji ka caktuar një sërë kriteresh për të përfituar, që nga koha e përdorimit të pronës jo më pak se 10 vite, deri te zotimi për të investuar në pronën në përdorim.