BE-ja po punon për të kushtëzuar anëtarësimin e Serbisë në bllok dhe mes kushteve detyruese pritet të përfshihet edhe zbatimi i marrëveshjeve që Serbia ka arritur deri më tani me Kosovën në dialogun e ndërmjetësuar nga Brukseli. Për këtë po punon Komisioni Evropian, dhe Shërbimi i Veprimit të Jashtëm i BE-së i cili do të ndryshojë kornizën e bisedimeve në kapitullin e 35 me Serbinë. "Puna në këtë drejtim po vazhdon në përputhje me kërkesën e vendeve anëtare", tha zëdhënësi i BE-së, Peter Stano. Kërkesa për ndryshim të kushteve në kapitullin 35 u bë nga shtetet anëtare të BE-së, pasi Serbia zyrtarisht përmes kryeministres së saj, Ana Brnabic, tha se "vendi i saj nuk do t'i zbatonte të gjitha marrëveshjet, për të cilat u pajtua me Kosovën”. Kryeministri i Kosovës, Albin Kurti e ka akuzuar Serbinë se nuk po e respekton Marrëveshjen për normalizim të ndërmjetësuar nga Bashkimi Evropian. "Neni një i marrëveshjes thotë që palët, pra Kosova dhe Serbia do të zhvillojnë marrëdhënie të mira fqinjësore me njëra-tjetrën, bazuar në të drejtat e barabarta. Serbia megjithatë, zgjedh gjithçka mbi zhvillimin e marrëdhënieve të mira me ne, ajo në të vërtetë zgjedh të sulmojë Kosovën, siç bëri më 24 shtator në Banjskë, dhe pastaj të mbrojë autorët e kësaj vepre ", tha Kurti.