Dialogu Kosovë-Serbi mbetet priroritet për Bashkimin Europian, që tashmë është duke zbërthyer të gjitha gabimet e regjistruara me qëllim që të gjejë mënyrën për të normalizuar marrëdhëniet mes dy vendeve. Shefja e politikës së Jashtme të bllokut evropian, Kaja Kallas tha se Brukseli është duke analizuar të gjitha detajet. “Çfarë është me rëndësi për neve është normalizimi i marrëdhënieve, sepse pa këtë asnjëra nga to nuk mund të ecë përpara ne rrugën drejt BE-së”, tha Kallas nga Podgorica. Kallas nuk dha më shumë hollësi mbi faktin se çfarë ka shkuar keq deri më tani në procesin e negociatave mes Prishtinës e Beogradit. Me gjithë dialogun e zhvilluar ndër vite dhe nënshkrimin e marrëveshjeve, procesi ka ngecur dhe tensionet janë rritur. Nën ndërmjetësimin e BE-së, në vitin 2023 Kosova dhe Serbia arritën marrëveshje për rrugën drejt normalizimit të marrëdhënieve. Por, prej atëherë, blloku i ka kritikuar ato të dyja vendet se nuk e kanë zbatuar marrëveshjen pavarësisht se ajo është e detyrueshme për to.