Bashkimi europian, ka akuzuar Pekinin dhe Moskën se janë përpjekur të minojnë besimin e publikut në Agjencinë Evropiane të Barnave (EMA) dhe të hedhin dyshime mbi procedurat e saj dhe paanshmërinë politike", vlerëson Bashkimi Evropian . Këto fushata synojnë denigrimin e vaksinave perëndimore thuhet në një raport të Shërbimit të Jashtëm të BE-së. Sipas këtij raporti që prej dhjetorit, mediat ruse, autoritetet dhe kompanitë shtetërore janë bashkuar për të promovuar vaksinën Sputnik V duke përdorur "mesazhe armiqësore" ndaj BE-së, tha raporti. Ndërkohë, Kina po promovon vaksinat e saj si "më të përshtatshme për vendet në zhvillim", ndërsa ka shfaqur "retorikë mashtruese" në lidhje me sigurinë e vaksinave perëndimore dhe madje edhe mbi origjinën e koronavirusit. Nga ana tjetër, shpërndarja e vaksinave në bllokun evropian është përballur me kritika për shkak të mungesës së furnizimit. Brukseli këmbëngul se furnizimet tani po shtohen dhe blloku synon të vaksinojë 70 për qind të të rriturve deri në fund të korrikut. Megjithatë, Hungaria, anëtare e BE-së, ka marrë vaksinën ruse dhe kineze ndërsa Austria dhe Gjermania kanë njoftuar se janë në bisedime për të blerë Sputnik V. Agjencia Evropiane e Barnave ka nisur në muajin mars një vlerësim të Sputnik V. Nëse merr miratimin e rregullatorit evropian kjo do të ishte vaksina e parë jo-perëndimore kundër koronavirusit e autorizuar për përdorim në bllokun e 27 vendeve. Pamjet: AFP