Kievi do të ndajë 260 milionë hryvnia apo 6.2 milionë dollarë, për një program interceptorësh dronësh për të mbrojtur qiellin e kryeqytetit nga dronët rusë, thanë autoritetet e qytetit të premten. Rusia ka shtuar sulmet e saj të kombinuara ndaj kryeqytetit ukrainas në javët e fundit, duke lëshuar qindra dronë dhe raketa në sulme gjatë natës që zgjasin me orë, e që kanë shkaktuar dëme në shumicën e lagjeve të qytetit. "Këto fonde do të përdoren jo vetëm për të blerë pajisje, por edhe për të krijuar një sistem efektiv reagimi", shkroi kreu i administratës ushtarake të qytetit të Kievit, Tymur Tkachenko, në aplikacionin e mesazheve Telegram. Qyteti tha se planifikonte të përfshinte fonde shtesë jashtë buxhetit ekzistues, pa specifikuar se sa do të nevojitej. Tkachenko tha se një projekt pilot kishte provuar efektivitetin e tij fillestar duke interceptuar pothuajse 550 dronë të lëshuar nga Rusia për të sulmuar rajonin e Kievit në muajt e fundit. Sulmet vdekjeprurëse i kanë shtyrë udhëheqësit ukrainas të ripërtërijnë thirrjet e tyre urgjente për ndihmë në mbrojtjen ajrore nga aleatët. Presidenti ukrainas Volodymyr Zelenskiy ka raportuar gjithashtu për përdorimin e suksesshëm të dronëve interceptues për të ndihmuar në sprapsjen e sulmeve të mëdha dhe tha se puna po vazhdon për perfeksionimin e teknologjisë. Në Konferencën e Rimëkëmbjes së Ukrainës këtë javë, ai përmendi investimet në këtë lloj mbrojtjeje ajrore në takimet me partnerët holandezë, gjermanë dhe amerikanë. Autoritetet planifikojnë të hapin një qendër për trajnimin e operatorëve të dronëve interceptues dhe krijimin e njësive shtesë të lëvizshmne në kryeqytet dhe periferitë e tij, tha Tkachenko.