Komisioni Evropian do të miratojë më 12 tetor paketën vjetore të zgjerimit dhe raportet e progresit për secilin nga vendet e përfshira në këtë proces. Sipas burimeve të BE-së në Bruksel, raportet e këtij viti do të jenë një përzierje e elementeve pozitive, por edhe e shqetësimeve për mungesë progresi në disa fusha e madje edhe disa dështime. Komisioni Evropian pritet të përmendë nisjen e negociatave të anëtarësimit në BE me Shqipërinë dhe Maqedoninë e Veriut si zhvillimin kryesor pozitiv në procesin e zgjerimit të bllokut me rajonin e Ballkanit Perëndimor. Prej vitesh, këto dy vende kandidate kanë qenë në pritje të nisjes së negociatave, edhe pse, sipas Komisionit Evropian, i kanë patur të përmbushura të gjitha kushtet. Bullgaria hoqi në verë pengesën e fundit ndaj Maqedonisë së Veriut. Rrjedhimisht u hap edhe rruga për Shqipërinë. Komisioni Evropian pritet të konfirmojë përmes raportit të progresit se Kosova vazhdon t’i përmbushë kushtet për liberalizimin e vizave me vendet evropiane dhe se vizat për qytetarët e kosovës duhet të hiqen. Pritet ndërkohë që komisioni të ftojë Kosovën dhe Serbinë të bëjnë përparim në dialogun për normalizimin e marrëdhënieve, që do të çonte në arritjen e një marrëveshjeje gjithëpërfshirëse.