I nxehti afrikan ka mbërritur në Ballkan, duke bërë që rajoni ynë të përballet me temperature ekstreme. Kjo valë ekstreme e të nxehtit ka alarmuar rajonin e Ballakanit, teksa autoritetet shëndetësore u kanë bërë thirrje qytetarëve të qëndrojnë në ambiente të freskëta dhe të konsumojnë sa më shumë lëngje për të shmangur dehidratimin. Meteorologët në Serbi deklaruan të enjten se vendi ka shënuar ditën më të nxehtë që nga fillimi i matjeve në shekullin e 19-të, duke parashikuar temperatura edhe më të larta në ditët në vijim. Autoritetet u kanë rekomanduar qytetarëve të qëndrojnë në zona me hije ose në ambiente të kondicionuara, të shmangin ekspozimin ndaj diellit nga ora 11:00 deri në 17:00, si dhe kanë paralajmëruar për rrezikun që një thatësirë e zgjatur mund të paraqesë për të korrat. Sipas parashikimeve, temperaturat në të gjithë Ballkanin pritet të arrijnë deri në 40°C javën e ardhshme.