Izraeli ka bombarduar të hënën qytetin kryesor të jug të Gazës, Han Junis, pasi grupi palestinez Hamas, paralajmëroi se asnjë nga pengjet izraelite nuk do të largohet gjallë prej territorit, derisa të përmbushen kërkesat për lirim të të burgosurve. Hamasi, grupi radikal që udhëheq Gazën, është shpallur grup terrorist prej Shteteve të Bashkuara dhe Bashkimit Evropian. Hamasi e ka nxitur këtë luftë, pasi kreu sulmet më vdekjeprurëse ndonjëherë në tokë izraelite, më 7 tetor, duke vrarë rreth 1.200 njerëz dhe duke marrë rreth 240 pengje. Izraeli u përgjigj me ofensivë ushtarake, e cila tashmë e ka shndërruar një pjesë të mirë të Gazës në rrënojë, dhe ka vrarë rreth 17.990 njerëz, kryesisht gra dhe fëmijë, sipas autoriteteve shëndetësore palestineze. Sipas tyre, dhjetëra njerëz janë vrarë të hënën, si pasojë e sulmeve izraelite në Rripin e Gazës, ndërsa ushtria izraelite ka raportuar për lëshim raketash nga Gaza drejt Izraelit. Hamasi paralajmëroi të dielën se nuk do t’i dorëzojë gjallë pengjet, pa një shkëmbim të të burgosurve palestinezë dhe “negociata për rezistencën”. Izraeli ka thënë se janë ende 137 pengje në Gazë, ndërsa aktivistët thonë se 7.000 palestinezë janë ende në burgjet izraelite. Bombardimet e nisura prej 7 tetorit, dhe ofensiva tokësore, e kanë shtyrë sistemin shëndetësor në Gazë drejt kolapsit, pasi shumica e spitaleve nuk janë funksionale dhe gati dy milionë njerëz janë të zhvendosur.