Zyra e Prokurorit Publik në Maqedoninë e Veriut kërkoi që ish-zëvendëskryeministri Artan Grubi t’i nënshtrohet masës së arrestit shtëpiak, pasi u ndalua nga autoritetet maqedonase një ditë më parë. Ai u arrestua në pikën kufitare të Bllacës, mes Maqedonisë së Veriut dhe Kosovës. Grubi dyshohet për abuzim me detyrën zyrtare në rastin e njohur si “Lotaria Shtetërore”. Në këtë rast përfshihet edhe Përparim Bajrami, i cili po ashtu përmendet në aktakuzë si i dyshuar. Prokurorët dyshojnë se ata kanë përvetësuar rreth 8 milionë euro përmes prokurimit të pajisjeve të terminaleve të lotarisë elektronike. Prokuroria e ka justifikuar kërkesën për arrest shtëpie, duke thënë se shumica e të dhënave tashmë janë të siguruara, për faktin se Grubi është dorëzuar vullnetarisht para agjencive shtetërore për zbatim të ligjit, si dhe ka sinjale që “siguria e tij personale nuk mund të garantohet në një qendër ndalimi”.