Koreja e veriut ka prezantuar një lloj të ri rakete balistike që mund të lancohet nga një nëndetëse, e cila përshkruhet nga media shtetërore si arma më e fuqishme në botë. Disa prej raketave u prezantuan në një paradë e cila u zhvillua nën vëzhgimin e liderit kim jong un. Shfaqja e fuqisë ushtarake vjen vetëm pak ditë para inaugurimit të Joe Biden si president i shteteve të bashkuara të amerikës. Kjo pason një takim të rrallë politik, ku Kim e cilësoi SHBA si armikun më të madh të vendit. Imazhe të publikuara nga media shtetërore në korenë e veriut treguan të paktën katër raketa të mëdha, me ngjyrë të bardhë e të zezë, që kalonin përballë turmave që valëvisnin flamuj. Analistët nënvizuan se ajo ishte në fakt një armë që nuk është parë më herët. I veshur me një pallto lëkure dhe kapelë, Kim u pa të buzëqeshte dhe përshëndeste me dorë ndërsa ndiqte parakalimin në sheshin Kim il Sung, në penian. Në paradë, përfshiheshin edhe trupat tokësore, artileria dhe tanket. “Armët më të fuqishme në botë, raketat balistike që lëshohen nga nëndetëset, hynë në shesh njëra pas tjetrës, duke demonstruar fuqimisht forcën e forcave të armatosura revolucionare”, tha agjencia e lajmeve KCNA.