Një vrasës shqiptar, me probleme të theksuara skizofrenie i ka shpëtuar dëbimit nga Anglia për në Shqipëri, kjo pasi sipas vendimit të një gjykatësi ai mund të jetë i rrezikshëm dhe të dëmtojë persona të tjerë në atdheun e tij. Astrit Mija vrau shokun e tij të dhomës, Arben Basha në vitin 2003 vetëm 4 vite pasi kishte mbërritur në Britaninë e Madhe. Mija kishte mashtruar autoritetet britanike duke u regjistruar si refugjat kosovar. Për vrasjen e kryer, Mija ka bërë 17 vite burg. Në një situatë normale ai do të deportohej në Shqipëri pasi të kishte përfunduar dënimin. Por një gjykatës i emigracionit vendosi kundër deportimit të Mijës pasi ai mund të ishte i rrezikshëm për të tjerët pavarësisht kujdesit falas psikiatrik në spitalet shqiptare. Gjykatësja Anna-Rose Landes tha se Mija nuk kishte mbështetjen e familjes në Shqipëri ç’ka do të bënte që ai të mos merrte ilaçet e nevojshme. Diçka e tillë do ta bënte atë të rrezikshëm për veten dhe të tjerët.