Ambasadorët e vendeve anëtare të Bashkimit Evropian kanë miratuar nisjen e negociatave për heqjen e tarifave të roaming-ut me vendet e Ballkanit Perëndimor, përfshirë Shqipërinë. Vendimi pritet të marrë miratimin zyrtar nga Këshilli i BE-së, duke i hapur rrugë negociatave me Shqipërinë, Kosovën, Bosnje dhe Hercegovinën, Malin e Zi, Maqedoninë e Veriut dhe Serbinë. Komisioni Evropian kishte propozuar në shkurt zgjerimin e skemës “Roam Like at Home” edhe për Ballkanin Perëndimor. Nëse negociatat përfundojnë me sukses deri në fund të vitit, qytetarët e rajonit mund të përdorin telefonat e tyre në vendet e BE-së pa tarifa shtesë që prej vitit të ardhshëm. Kjo do të thotë se thirrjet telefonike, mesazhet SMS dhe interneti do të tarifohen njësoj si në vendin e origjinës, pa kosto shtesë gjatë udhëtimeve në Bashkimin Evropian. Skema “Roam Like at Home” është në fuqi në BE që prej vitit 2017 dhe konsiderohet një nga politikat më të suksesshme në dobi të qytetarëve evropianë.